CTAM növbəti beynəlxalq konfransda

Qərbi Azərbaycan İcmasının təşkilatçılığı ilə “Mədəni irs və qayıdış hüququ: Ermənistandan didərgin salınmış azərbaycanlıların mədəni irsinin bərpası – ədalətə, barışığa və sülhə aparan yol kimi” mövzusunda əhəmiyyətli konfrans keçirilib. Tədbirdə dövlət qurumlarının təmsilçiləri, yerli və xarici tədqiqatçılar, ictimai xadimlər, ekspertlər və media nümayəndələri iştirak ediblər. ABŞ, İtaliya, Niderland, Qırğızıstan, Bolqarıstan, Seneqal, Şotlandiya, İsveç, İsveçrə və ümumilikdə, 60 ölkənin tanınmış elm adamlarının iştirakı ilə geniş müzakirələr aparılmışdır. Müzakirələr Qərbi Azərbaycandan deportasiya olunmuş soydaşlarımızın mədəni irsinin sistemli şəkildə bərpası, beynəlxalq aləmdə tanıdılması və tarixi ədalətin təmin edilməsi istiqamətində gerçəkləşmişdir.

Konfransda “Cosmoline” Tərcümə Araşdırma və Mərkəzinin Qafqaz regionu üzrə eksperti Həsən Əhmədovun çıxışı böyük maraqla qarşılanıb. H.Əhmədov “Yeni Çağ Media TV”yə müsahibəsində bildirib ki, konfrans mədəni irsin bərpasının yalnız fiziki abidələrin yenilənməsi olmadığını göstərir. Bu prosesin mahiyyəti tarixi yaddaşın dirçəldilməsi, deportasiya olunmuş insanların hüquqlarının tanınması və gələcək nəsillərə obyektiv məlumatların ötürülməsi ilə bağlıdır. Qərbi Azərbaycan İcmasının təşkil etdiyi bu tip tədbirlər mədəni irsin beynəlxalq təşkilatlarda gündəmə gətirilməsi, yeni araşdırmaların aparılması və siyasi-hüquqi müstəvidə müzakirələrin genişlənməsinə təkan verir.

Konfrans çərçivəsində səsləndirilən fikirlər və təqdim olunan faktlar regionda sülhün və barışığın möhkəmləndirilməsinə də xidmət edir. Çünki mədəni irsə hörmət və onun bərpası münaqişələrin həllində vacib humanitar komponent kimi çıxış edir. Bu baxımdan, tədbirdə aparılan müzakirələr gələcək əməkdaşlıq proqramlarının formalaşmasına, həm yerli, həm də beynəlxalq səviyyədə yeni layihələrin icrasına zəmin yaradır.

Tədbirin sonunda iştirakçılar mədəni irsin qorunması və bərpası istiqamətində yeni təşəbbüslər irəli sürüblər. Ekspertlər və ictimaiyyət nümayəndələri bildiriblər ki, qayıdış hüququnun təmin olunması üçün mədəni irsin bərpası əsas prioritetlərdən biri kimi qalmalıdır. 

Keçirilən konfrans həm elmi, həm də ictimai əhəmiyyəti ilə seçilib və Qərbi Azərbaycanın mədəni irsi ilə bağlı aparılan işlərə mühüm töhfə vermişdir.